ولو اني مش بحب اصحي الصبح بدري وكسوله بس انا انهارده صحيت من النجمه , قلت بلاش استسلم و اصلي وانزل اتكل علي الله يمكن
ربنا يسهلها, وبعد مشربت كبايه الشاي بلبن اليوميه الي كل اصحابي بيعرفوني بيها, قررت اخيرا اني انزل بعد مده ياس طويله , قالولي في كم شركه ايطاليه فاتحه جديد و بما اني لسه جديده في كورس الايطالي ساعتها يمكن تصيب, بس الماساه في يوم زي ده ميكروباص المنطقه الرابعه او المناطق الصناعيه كلها عموما, يا سلااااااااام علي رزاله سواقينها و علي الفزلكه و قله الادب, انا مش هطول عليكم المهم ( ولو اني عرفه ان محدش بيفتح البلوج دي اصلا ), انا لاقيت واحد بينادي وسط الميكروباصات قلتله الرابعه ؟! قالي متاكده انك
رايحه الرابعه !! ساعتها استغربت قلت لنفسي هو يقصد ايه يكونشي راجل مش محترم ؟! ايوه مهي دي مشكلتي الاساسيه في البلد دي انهم مفكرين عشان انا بنت و بتنطط في كده بكل جراه يبقي انا كده رايحه اعمل حاجه مش كويسه!! سبحان الله دمغه غريبه! يعني انا مينفعش اكون مهندسه و عايزه اشتغل و ابقي محترمه !! طب انا حتي من شكلي مش باين عليه اني بنت ناس!! يالا ادي اولها و اديني همسك اعصابي عشان مترنفزش وعشان مودي ميتعكرش ع الصبح وركبت ميكروباص المناطق الصناعيه الشهير الي شبابيكه بتخنق و مفيهوش نفس , الراجل قالي اقعدي ورا! قلت لنفسي اللله الراجل ده عايز ايه! بصتله كده وانا متعصبه قالي انا خايف عليييييييييكي ! قلتله خايف عليا تركبني وراا!! قالي يا حول الله ورا واسع انما قدام بقعد اربعات هتتزنقي روحت عاندت واقعدت قدام راح قايل لا يا ابله مش بقعد بنات هنا اقعدي ورا و برده مسكت اعصابي تاني وقلت استحمل و اقعد ورا و بعد معدت رزالته و مناقشات السواق المصري السخيفه مع الركاب الي هو يحسسك انه بيشتغل صحفي مثلا! وانه الحياه يا عيني صعبه عشان كده هيركبنا اربعات و بعد كم كلمه حلوين عشان يهدي الزبون بعد الشد و الجذب والفزلكه, اخيرا العربيه مشيت و طبعا عشان انزل ف المكان الي عيزاه دي لوحدها قصه! و كاي سواق مصري لازم يقولك انه عارف المكان وف الاخر يا ينساك يا يتوهك ! المهم نزلت بعد ما نا الي عرفته المكان ( بما اني مش ا ول مره اروح ادور ع شغل ف الصحرا دي ) و بما انه بيتفزلك و هو مش فاهم حاجه يعني تقريبا انا الي وصلته ! ونزلت في حته فاضيه خااااااااااااالص عباره عن صحرا و من بعيد مصنع جديد لسه بيتبني و صعايده واقفين فيه و دماغهم شكلها سايحه من الشمس و طبعا مستغربين القمر ده ازال جاي في عز الظهر ! و اكيد مخهم راح لبعيد مهو في البلد دي محد ش بيفترض غير النيه السيئه !بس متخافوش مش هتخطف لان مفيش بني ادمين يقدروا يجوا هنا عشان يخطفوني, المهم وصلت اخير للمصنع الي بدور عليه بس كان شكله نضيف اوي و وانا اول حاجه بعملها اول مبدخل اي شركه بتخيل نفسي شخصيه مهمه فيها يلا يعني الاحلام بفلوس مثلا !
بس الحمدلله بتوع الامن المرادي كويسين ومحدش فيهم اتفزلك عليا و قالولي ان ده مش مكان التقديم وان الاداره في المصنع الي جمبيهم و ان في واحد هناك اسمه خالد اقول للبوابه يدخلوني ليه وطبعا ف المناطق الصناعيه عشان تروح البوابه الي جمبيهم دي فيها ولا مشوار كيلو و اتفاجات بالكلاب المساعير حباببي الي بيميزوا برج العرب جدااااااا فكروني باخر مره لفيت فيها ع شغل السنه الي فاتت لما جريوا ورايا لحد محسيت اني قطعت الخلف وفين وفييييييييييييييين لما لاقيت ناس انقذوني اخيرا بعد مكنت فقدت الامل اني اعيش او اخلف! والهي انا بكتبلكم من غلي انا بس بطلع غلبي يمكن اروق.
المهم قلت انا ههدي خااااااااالص ومش هخاف يعني انا دلؤقتي مش خايفه و همشي ع الناحيه التانيه عشان الكلبتين الحلوين ميصحوش من نومهم . ونجحت ف خطتي اخير و انتصرت ع اهم مرحله ف البحث عن وظيفه في برج العرب الا وهي الكلاااااااااااااب! بس والهي البني ادمين مساعير اكتر .
وصلت البوابه التانيه و لاقيت راجل ابن حلال قالي هدخلك ع اساس انك جاياله هو شخصيا مش كواحده بتدور ع شغل لاني لو قلتله انك بتدوري ع شغل هياخد السي في ويرميه وراح يكلمه ف التليفون ساعتها قلت لنفسي يعني مفيش فايده ف البلد دي مش هتتغير ابد لا قبل الزفت مبارك ولا بعده , طب وبعدين ايه النهايه انكنش ربنا يلطف بينا وياخدنا ونخلص و طبعا اللئيم الي اسمه خالد ده لازم يخليني اتكلم معاه التليفون عشان يرزل الاول وبعدين ادخل اقابله امال لو مكانش حته موظف صغير هو ماله ياختي كده نافش ريشه ولا كانه الطالياني صاحب الشركه ذات نفسه نهايته دخلت للباشا اخيرا و دخلني ع المييتنج رووم فكرتني بالشركه التركيه الي كنت بشتغل فيها و بالايام السودا الي خلتني اسيبها ! و قعدت مع الاستاذ الي لحد دلؤقتي مش فاهمه هو نافش ريشه ع ايه و بعد مقلب في السي في بتاعي شويه وبنفس نظره الاستهذاء بتاعه بتوع الاتش اار الي بيكرهوا المهندسين معرفش ليه و خصوصات المهندسات الشابات الحلوات
,و لما عرف اني بعرف لغات راح ضحك كده ضحكه فيها سخريه ولا كاني قلتله نكته المهم هعدي دي كمان و همسك اعصابي و مش هتنرفز اديني هاديه اهو ومش عصبيه زي مبيقولوا . و لما عرف اني كنت بشتغل في الترجمه قبل كده ضحك نفس الضحكه تاني برده مسكت اعصابي و سكت و لما سالني سبت الشركه التركيه ليه قلتله اصل المعامله هناك وحشه و حاولت اني اهرب من اجابه السؤال و قلتله اصل انا انشغلت بعدها ف دراسه اللغات و اخدت كزا لغه و كده . راح ضاحك تاني نفس الضحكه البايخه المرادي بقي مقدرتش امسك نفسي و قلت لا انا هطلع غلي فيه عشان لو مسكت نفسي هندم طول اليوم اني مخدتش حقي منه في ستين داهيه الوظيفه هو ماله هيتنك عليا ليه . قلتله هو حضرتك ليه بتضحك كل ماجيب سيره اللغات ؟! اصلي ملاحظه كل ماقول اي حاجه عن الحكايه دي تضحك ع العموم لو مش مصدقني ممكن تختبرني قالي لا ابد اصل انا مستغرب انك بتتكلمي عن حاجه ف مجال تاني خالص قلتله انا لما كنت متقدمه للشركه التركيه كان معايا واحد تاني و انا كنت بعرف تركي قبلوني انا و سابوه هو , اللغه بتفتح قدامك ابواب كتيره و خصوصا لو انت مهندس , راح قالي ع العموم انا مش هستناكي عشان تقوليلي اختبرك انا هاخد مساحتي ف كل حاجه و هختبرك لما يجي وقته المهم وراح رد الردود العاديه بتاعت كل الشركات و مشيت .
انا مش زعلانه عشان الي حصل انا بس بسال نفسي هي اخرتها ايه مع البلد دي ؟ هي الناس مش هتتغير ؟ ليه كل واحد ماسك مكان عامل نفسه ولا كانه مدير !عايزه افهم مين الي بيحط الناس دول و ليه دول بزاد ! قال وبيسالوني عايزه تهجي ليه دي البلد دي احسن من غيرها !
